21 Prill 753 P.E.S – Themelohet qyteti i Romës
Sipas legjendës, më 21 prill 753 Para Erës Sonë, Romuli dhe vëllai i tij binjak, Remi, themeluan qytetin e Romës në vendin ku kishin pirë dikur qumësht nga gjiri i ulkonjës, që i gjeti të braktisur anash një lumi. Në fakt, miti i Romulit dhe Remit zë fill diku në shekullin IV P.E.S, ndërsa data e saktë e themelimit të Romës, u përcaktua nga studiuesi romak Mark Terenc Varro në shekullin I P.E.S
Sipas legjendës, Romuli dhe Remi ishin fëmijët e Rea Silvias, bijës së Mbretit Numitor të Alba Longa. Alba Longa, ishte një qytet mitik i vendosur në juglindje të kodrave Albane, aty ku do shtrihej më vonë Roma. Para lindjes së binjakëve, Numitor u rrëzua nga froni nga vëllai i tij
më i vogël Amuli, i cili e detyroi Rean të bëhej një virgjëreshë, në mënyrë që të mos lindte pretendentë për frouin.
Megjithatë, Rea u mbars nga Zoti i Luftës Marsi, dhe lindi Romulin dhe Remin. Amuli urdhëroi mbytjen e dy foshnjave në lumin Tiber, por ato mbijetuan kur rrjedhja i nxori në breg, buzë kodrës Palatine, ku u ushqyen nga një ulkonjë derisa u gjetën nga bariu Faust.
Pasi u rritën nga Fausti dhe gruaja e tij, binjakët u bënë më vonë udhëheqës të një grupi luftëtarësh të rinjsh, që ishin barinj në profesion. Pasi mësuan identitetin e tyre të vërtetë, ata sulmuan Alba Longën, vranë Amulin e lig, dhe e rikthyen në fron gjyshin e tyre.
Binjakët vendosën më pas të themelonin një qytet pikërisht në vendin ku ishin shpëtuar nga ulkonja kur ishin ende foshnje. Por gjatë ndërtimit, ata u përfshinë në një sherr midis tyre, dhe Remi u vra nga vëllai i tij Romuli, që u bë sundimtar i një vendbanimi që u quajt Roma pas vdekjes së tij. Për të populluar qytetin e tij, Romuli u ofroi strehë të arratisurve dhe të internuarve.
Megjithatë, Romës i mungonin gratë, ndaj Romuli ftoi fisin fqinj të Sabinëve në një festival, dhe i rrëmbeu gratë e tyre. Kjo shkaktoi një luftë, por gratë Sabine ndërhynë për të parandaluar që burrat e fisit të tyre të pushtonin Romën. U nënshkrua një traktat paqeje, dhe komunitetet u bashkuan nën sundimin e përbashkët të Romulit dhe mbretit Sabin, Titus Tatius.
Vdekja e hershme e Tatiusit, ndoshta e shkaktuar nga Romuli, e la këtë të fundit në krye të mbretërisë. Pas një sundimi të gjatë dhe të suksesshëm, Romuli vdiq në rrethana të panjohura. Shumë romakë besonin se ai u shndërrua në një Perëndi, dhe për këtë arsye ata e adhuronin si hyjnia Kuirinus.
Pas Romulit, Roma pati 6 mbretër të tjerë, kur 3 të fundit besohej të ishin etruskë. Rreth vitit 509 P.E.S, u themelua Republika Romake. Në shekullin IV para Krishtit, Roma filloi të zgjerohej brenda gadishullit italian, duke ndërtuar gradualisht në një ndër perandoritë më të mëdha të të gjitha kohërave.
19 Prill 1989 – Studentët kinezë, fillojnë protestat në sheshin Tiananmen në Pekin
Gjashtë ditë pas vdekjes së Hu Yaobang, udhëheqësit reformator të Partisë Komuniste Kineze, rreth 100 mijë studentë mblidhen në sheshin Tiananmen të Pekinit, për të përkujtuar Hu, dhe shprehur pakënaqësinë e tyre ndaj qeverinë autoritare komuniste. Përfaqësuesit e studentëve, i dërguan një peticion qeverisë, duke kërkuar një takim me kryeministrin Li Peng.
Qeveria kineze e refuzoi një takim të tillë, çka shkaktoi një bojkot të përgjithshëm të universiteteve në të gjithë vendin, dhe thirrje më të gjera për reforma demokratike. Duke injoruar paralajmërimet e qeverisë për shtypjen e dhunshme të çdo demonstrate masive, studentët nga më shumë se 40 universitete, filluan një marshim në Tiananmen më 27 prill.
Me studentët u bashkuan punëtorë, intelektualë dhe nëpunës civilë, ndërsa deri në mesin e majit, sheshi u mbush nga më shumë se 1 milionë njerëz. Më 20 maj, qeveria shpalli zyrtarisht ligjin ushtarak në Pekin, ndërsa urdhëroi ushtrinë të shpërndante me forcë disidentët. Megjithatë, një numër i madh studentësh dhe qytetarësh bllokuan përparimin e ushtrisë, dhe më 23 maj forcat qeveritare u tërhoqën në periferi të Pekinit.
Më 3 qershor, pas dështimit të bisedimeve për t’i dhënë fund protestave disa javore, ushtria mori urdhrin e prerë për të kërkuar boshatisur me çdo kusht sheshin Tiananmen. Deri në fundin e ditës që pasoi, trupat kineze arritën të spastrojnë sheshin dhe rrugët e Pekinit, duke vrarë qindra demonstrues, dhe duke arrestuar mijëra protestues dhe disidentë të tjerë.
Në javët që pasuan, një numër i panjohur i disidentësh u ekzekutuan me vdekje, dhe kontrollin e vendit e morën komunistët e vijës së ashpër. Bashkësia ndërkombëtare u indinjua nga këto ngjarje, ndërsa sanksionet ekonomike të imponuara nga Shtetet e Bashkuara dhe vendet e tjera,
e futën në krizë ekonominë e Kinës. Megjithatë, në fund të vitit 1990, tregtia ndërkombëtare rifilloi, pjesërisht falë lirimit të disa qindra disidentëve të burgosur.
19 Prill 1506 – Përfundon Masakra e Lisbonës, ku mbi 1.900 persona të dyshuar si hebrenj, u vranë nga të krishterët portugezë.
19 Prill 1802 – Dymbëdhjetë mijë vehabitë nën drejtimin e Abdul-Aziz bin Muhamed, pushtojnë qytetin e Qerbelasë në Arabi, duke vrarë mbi 3 mijë banorë dhe shkatërruar qytetin.
19 Prill 1918 – Piloti gjerman i njohur si “Baroni i Kuq”, Manfred von Richtofen, gjen vdekjen pas rrëzimit të avionit të tij gjatë Luftës së Parë botërore. Avioni i tij ishte i kuq, dhe kryerja prej tij e rreth 80 sulmeve të suksesshme gjatë luftës, e shndërroi atë në një hero dhe mjet propagande.
19 Prill 1967 – Svetlana Alliluyeva, vajza e Josif Stalinit merr strehim politik në SHBA. E njohur më pas si Lana Peters, ajo shkroi një libër dhe dha shumë intervista për median amerikane, duke denoncuar krimet e babait të saj dhe diktaturës konuniste në përgjithësi në Bashkimin Sovjetik.
19 Prill 1967 -Pak ditë para zgjedhjeve të përgjithshme parlamentare në Greqi, koloneli Jorgo Papadopulos drejton një grusht shteti, duke vendosur në vend një regjim ushtarak që do të zgjasë 7 vjet.
19 Prill 2010 –Presidenti ukrainas Viktor Janukoviç dhe ai rus Dmitri Medvedev, nënshkruajnë Marrëveshjen e Kharkivit, e cila u shkel në mënyrë të njëanshme nga Rusia më 31 mars 2014, me aneksimin e Krimesë.
