Anëtari i Nismës Socialdemokrate, Haxhi Hoti është arrestuar nga Policia e Kosovës, pasi kërcënoi kreun e Lëvizjes Vetëvendosje, Albin Kurti.
Ky lajm është konfirmuar nga zëdhënësi i Policisë së Kosovës, Daut Hoxha për gazetën “Express”.
“Dje e kanë kërkuar në shtëpi nuk e kanë gjetur aty. Policia ka njoftuar të gjitha njësitet që i njëjti të arrestohet, ndërkohë ai është paraqitur në polici. Me urdhër të Prokurorit është dërguar në mbajtje për 48 orë”, deklaroi Hoxha.
Hoti shkruante në “Facebook” se Kurti ka dy rrugë, të lëshojë Kosovën ose të vritet.
“Albin Kurti i ika 2 rrugë: ose ta lëshojë Kosovën ose të vritet”, kishte shkruar Hoti. Postim të cilin e fshiu. Më pas, publikoi një tjetër reagim, teksa kërkonte falje.
“Është një gabim teknik i imi, ku mediat pa me pyetur mua e kanë shpërnda këtë shkrim! Kërkoj falje publike. Dhe nuk ka qëndrim te subjektit qe i takoj”.
Ky status ka marrë edhe kundërpërgjigjen e Lëvizjes Vetëvendosje, e cila dorëzoi një kallëzim penal ndaj Hotit, duke e quajtur kërcënim brutal.
