Ajo është cilësuar si “Nënë Tereza e dytë” pasi ka punuar vullnetarisht për 8 vjet duke u ardhur në ndihmë fëmijëve shqiptarë në Austri, me probleme të ndryshme shëndetësore.
Fatime Blakaj ka deklaruar për emisionin “Rreze Dielli” se jeton në Austri prej 31 vitesh dhe profesionin e saj të parë e ka dizajnuese, por pas emigrimit drejt Austrisë, duket se jeta e saj mori një rrjedhë tjetër.
“Ishte vjeshtë e vitit 1992, kur mora vesh për disa fëmijë që ishin në spital, dhe shkova për t’i bërë një vizitë, nga ajo ditë nuk i jam larguar më, me thënë të drejtën ato dy fëmijë që i takova për herë të parë, ata dy fëmijë shqiptar e ndërruan kahjen e jetës sime”, thotë Fatime Blakaj, e cila pas asaj dite, ajo nuk dëshironte më që të vazhdonte profesionin e saj.
“Kam punuar 8 vite vullnetarisht pa asnjë kompensim, me ndihmën e ish-bashkëshortit dhe fëmijëve të mi, gjithmonë kam pas dhe jam munduar që sa herë janë nisur fëmijët për Shqipëri, t’ju blejë rroba e gjëra të reja. Ajo tregoi se ka ndihmuar mjaft fëmijë dhe familje shqiptare gjatë këtyre viteve duke iu gjendur pranë në çdo moment.
“Janë më shumë se 2000 fëmijë që i kam pasur nëpër duart e mija me thënë të drejtën, fëmijë që i kam fshirë lotët, që i kam ledhatuar flokët, fëmijë që i kam shtrënguar dorën, që i kam mbajt kur kanë qenë vetëm fare”, thotë Fatime Blakaj.
Ajo kujton rastin e një fëmije, i cili padashur ka pirë acid, por edhe raste të tjera, me probleme në zemër etj, por që sot shumë prej tyre gëzojnë shëndet të plotë.
