Analisti Andi Bushati është shprehur se opozita duhet të flasë me fakte në lidhje me akuzat e bëra një ditë më parë, ku tha se ekzistojnë përgjime me kriminelë të kryebashkiakut të Durrësit, Vangjush Dako për pazare për vota në zgjedhjet e 25 qershorit.
Bushati tha se këto supozime janë më shumë problem për opozitën, pasi sipas tij “nëse flet me shkelje syri e nuk del me fakte të vërteta, do të humbasë besueshmërinë tek publiku”.
I ftuar në rubrikën “Opinion” në studion e lajmeve në “News24”, analisti shtoi: “Duket sikur ka një ngushtim laku për kryebashkiakun e Durrësit. Disa gazetarë që merren me dosjet e kronikës pohojnë se një kryebashkiak tjetër socialist ka rënë pre e përgjimeve, tani del opozita duke e futur në përgjime që sipas tyre janë bërë nga të huajt. Unë e kam problemin më shumë këtu te opozita. Duhet të mbarojë ajo lloj loje me shkelje syri e me nënkuptime, o fol me fakte o hesht. Është debat shterpë kështu. Opozita o ka dokumente, ose i bën hipoteza këto. Kjo mund të ketë kundër efekt tek publiku, se shikoni zbulime të forta kanë bërë qytetarët dixhitale të Berishës, por si kanë humbur ato kur Berisha denoncon për çdo gjë e shpesh ka dalë blof. Më mirë opozita të ngrejë kauza se sa të hedhë në sheshin e politikës të vërteta e të pavërteta bashkë”.
I pyetur nëse ka efekte te opinioni publik, analisti tha se pa dyshim që ka. “Ka kundërefekte, ku qytetari dixhital i shkruan ish-kryeministrit se ka zbuluar shumë gjëra, e në disa raste Berisha del blof. Një e pavërtetë bën që të vdesë një e vërtetë”, tha analisti.
Ndërsa në lidhje me kërkesën e PS-së për largimin nga detyra të kryeprokurorit Adriatik Llala, kreut të KQZ-së Klement Zguri dhe ish-kreut të SHISH-it, Visho Ajazi, Bushati tha: “Truku që po përdorin socialistët është si marrja e diçkaje që atyre u takonte. Ajo që tërheq më shumë vëmendjen është çështja e Visho Ajazit. I vetmi dyshim që e kemi trajtuar është sikur ka një marrëveshje të heshtur mes tij dhe kryeministrit Edi Rama, por se për çfarë është bërë nuk e dimë”.
