Presidenti i Francës, Emmanuel Macron, deklaroi se evropianët duhet të jenë të qartë dhe të vendosur jo ndaj popullit turk, por përballë qeverisë së presidentit Erdogan.
Sipas Macron-it, Turqia ka treguar sjellje të papranueshme ndaj anijes franceze në ujërat libiane. Në konferencën për shtyp përpara samitit të përfaqësuesve të vendeve të Evropës Juglindore, presidenti francez tha se është e nevojshme të diskutohet se çfarë është e nevojshme për të rivendosur dialogun me Turqinë.
Ai shtoi se pozicioni i Francës është fiksuar muajt e fundit dhe se kjo nuk është drejt ngritjes së tensioneve. Ministria e Jashtme turke u përgjigj se deklaratat ishin “vetëm një reflektim i dobësisë personale dhe pashpresës së Macron, në të cilin ai ka rënë”.
“Presidenti francez Macron, duke ndjekur refleksin e vjetër kolonialist, po bën edhe një herë deklarata arrogante dhe po japë mësime nga lartësia”, thuhet në deklaratën e Ankarasë, duke shtuar se “ka kaluar koha kur Franca mund të bënte çfarë të donte në të gjithë botën. Macron, lojërat e ndyra të të cilit ne i kemi shkatërruar dhe prishur të gjitha planet dinake të politikës së jashtme, tani po sulmon me zemërim Turqinë dhe presidentin tonë. Presidenti ynë është një nga udhëheqësit e zgjedhur në detyrë me mbështetjen më të madhe të votuesve në Evropë dhe ai gjithmonë e ka pasur forcën nga populli turk. Populli dhe qeveria turke kanë qenë gjithmonë dhe do të jenë të bashkuar kundër sulmeve të tilla.
Macron nuk është një njeri që mund të vendosë kufij detarë në Mesdhe ose ndonjë rajon tjetër të botës”, deklarata e Ankarasë thekson më tej se Franca duhet të jetë “një mbështetëse e dialogut dhe marrëveshjes, dhe jo të angazhohet në mbështetje të verbër për Greqinë dhe Qipron Jugore, të cilat e kanë bërë BE-në të jetë peng të interesave të tyre mendjengushta dhe dritëshkurtra me nxitje të njëanshme.
Kjo është diktuar nga vlerat evropiane dhe aleanca jonë në NATO. Me një qëndrim individual dhe nacionalist, Presidenti i Francës inkurajon tensionet dhe vë në rrezik interesat e mëdha të Evropës dhe BE. Franca, e cila nuk ka kufi në Mesdheun lindor dhe ende drejtohet nga mentaliteti kolonial, nuk ka asnjë bazë për një sulm ndaj politikës së jashtme të Turqisë, e cila është provuar të jetë aleate, e sinqertë, bashkëpunuese, njerëzore dhe aktive. Ne ia lëmë popullit francez të vlerësojë situatën në të cilën ka rënë Macron, duke humbur gjithnjë e më shumë mbështetjen e publikut në Francë”, përfundon deklarata.
