Juventusi ka mposhtur Frosinonen me rezultatin 0-2, falë golave të Ronaldos dhe Bernardeschit. Një ndeshje mjaft e vuajtur nga bardhezinjtë të cilët tashmë shkëputen të vetëm në vendin e parë duke regjistruar 5 fitore në 5 ndeshje.
Bardhezinjtë e nisin ndeshjen në sulm dhe e dominojnë kundërshtarin në çdo aspekt të lojës, por është mjaft e vështirë ta dërgojnë topin në rrjetë. Ronaldo mund të kishte kaluar të tijtë në avantazh po të mos kishte qenë për mbrojtësin që e largoi nga vija fatale.
Juventusi provon në të gjitha mënyrat për të zhbllokuar ndeshjen, por Frosinone mbrohet me 10 lojtarë në zonë duke larguar çdo top, pa menduar aspak për të sulmuar. Ronaldo bëhet protagonist edhe në pjesën e dytë me dy raste të pastra të humbura, ku në një rast tentoi të shënonte me thembër por që pritet nga portieri.
Por në minutën e 82’ godet Cristiano Ronaldo. Pasi merr një pasim të bukur brenda zonës, portugezi godet me të parën duke zhbllokuar rezultatin. Një gol i merituar për miqtë që sigurojnë fitoren me golin e Bernardeschi-t në kohën shtesë pas një kundërsulmi.
