Pesë vite më parë këngëtari shqiptar Dr.Flori, u nda nga jeta.
Sot, aktori i humorit Julian Deda i ka kushtuar një shkrim prekës mikut të tij.
Ai përmes një postimi në Instagram ka treguar pengun e madh që i ka mbetur nga Dr.Flori.
Juli shprehet i penduar që e ka refuzuar ofertën e Dr.Florit për të realizuar një video për videoklipin e tij.
“Na ka marrë malli për pak Dr. Flor…! Po, vërtetë kam shumë mall për pak Dr. Flor. Mungon shumë Flor, mungon se s’kishte të dytë si ti. Repistë ka boll, muzikantë ka sa të duash, por shpirtra të lirë ka aq pak në këtë vend sa do të mjaftonin gishtat e njërës dorë për t’i numëruar. Ti ishe i tillë. I bëje keq vetes, por në fund të fundit ishe artist me botë të madhe dhe një nga njerëzit më të lirë që kam njohur. Në këtë 5 vjetor të ikjes tënde fizike, mungon plako, mungon shumë, i mungon familjes, i mungon shoqërisë dhe sidomos muzikës.
Nuk e kam thënë ndonjëherë, por më vjen inat me veten, që kur më the “Julo, a do vish të bësh një rol te klipi im i ri?”, për këngën “Ça na ke”, të thashë “aman o Flor mos na ngatërro me këto punë” dhe ti ma ktheve direkt “e di që e ke mirë ti, as po bëj fare. Po i fus një video të thjeshtë dhe po e mbyll”. Pishman e kam. Mbase do kishim bërë një super videoklip.
Por ti Flor nuk kishe nevojë për klipe apo për garnitura, sepse ishe i thellë në thelb dhe plot në përmbajtje. Kjo mungon sot më së shumti. Prandaj na ka marrë malli për pak si ti. I përjetshëm është kujtimi yt. Të përshëndes nga këtu poshtë Flor”, shkruan Juli.
https://www.instagram.com/p/B49qyqqFy73/
