Gjatë përplasjeve në KZAZ-të e ndryshme, janë lënduar edhe gra e vajza, kryesisht për shkak të hedhjes së gazit lotsjellës. Lidhur me këtë ka reaguar edhe kryebashkiaku i Kavajës, Isa Sakja i cili ka shprehur nderime për çdo nënë e grua kavajse që i ka mbështetur edhe në rrethana të egra siç ishte përplasja në KZAZ-në e qytetit.
“Për ato të guximshmet që janë përkrah nesh, për ato të guximshmet që hapën dyert, e i shndërruan shtëpitë në spitale duke ofruar gjithçka për të kaluar situata të rënda fizike shkaktuar nga helmimi me LHL, për ato të guximshmet që mbushin qiellin e Kavajës me lutje për bijtë e bijat që përballen për dinjitetin e nje shoqërie që nuk e duan ta shohin të rrëshkasë në diktaturë!
Ju puth duart e ju them: ju jeni heroinat tona!
Ju kam n’ zemër”, shkruan Sakja, teksa ka publikuar një foto të një gruaje e cila është helmuar nga gazi lotsjellës.
Militantë të opozitës në Kavajë dhe punonjës të bashkisë kërkuan lirimin e ambienteve të shkollës “Tre dëshmorët” nga materialet zgjedhore, gjë që çoi në përleshjen e tyre me efektivët e Policisë se Shtetit.
Teksa turma qëllonte me gurë mbi ta, policia lëshoi gaz lotsjellës për t’i shpërndarë.
