Pas vendimit të fundit të qeverisë, që qytetarët të kufizojnë lëvizjet e tyre, edhe bankat kanë reduktuar oraret. Vendimi i qeverisë parashikon se dalja e këmbësorëve do të kufizohet vetëm në fashat orare 06.00- 10.00 dhe 16.00- 18.00.
Referuar vendimit më të fundit të Ramës, sot herët në mëngjes, bankat u kanë dërguar nga një sms sqaruese të gjithë klientëve të tyre. Bankat kanë njoftuar klientët përmes mesazheve për oraret e kufizuara të punës, që përgjithësisht janë nga ora 7:00 e mëngjesit deri në orën 9:00 ose 10:00.
Pas përhapjes së koronavirusit, bankat kanë vijuar aktivitetin me personel të reduktuar, e po kështu me orare të kufizuara.
Shërbimi ndaj klientëve është kryer nën masat e rekomanduara të sigurisë, ku klientët duhet të respektojnë radhën në distancë, jashtë ambienteve të bankës. Kur hyjnë në bankë u kërkohet të dezinfektojnë duart, ndërsa qëndrojnë në distancë më shumë se një metër nga punonjësi i bankës, gjatë kryerjes së shërbimit.
165 këmbësorë janë ndëshkuar nga Policia e Shtetit, me një gjobë prej 10 mijë lekë të reja, pasi nuk kanë respektuar oraret e kufizuara të lëvizjes. Bilanci i të infektuarve nga COVID-19 sot ka shkuar në 64 të prekur dhe 2 viktima.
