Shpenzimet e shfrenuara dhe ndonjëherë idiote, mund të bëjnë “pluhur” edhe pasuritë më të mëdha monetare. Shembulli më emblematik, është ai i 79-vjeçares Jocelyn Wildenstein, që nga miliardere pak vite më pare, sot jeton vetëm me 900 dollarë në muaj asistencë sociale. Jocelyn lindi në Zvicër në një familje modeste.
Por u bë e pasur falë njohjes dhe martesës me manjatin amerikan Alec Wildenstein. Pas divorcit nga ky i fundit në vitin 1999, Jocelyn përfitoi menjëherë plot 2.5 miliardë dollarë, dhe 100 milionë dollarë çdo vit për 13 vitet e ardhshme. Pra në total 3.8 miliardë dollarë. Megjithatë ajo nisi të bënte shpenzime të çmendura.
Mediat raportonin se vetëm fatura e telefonit të saj shkonte në vit në mbi 60.000 dollarë, ndërsa për ushqim dhe verë shpenzonte mbi 547.000 dollarë. Ajo tentoi të kthejë pas rininë e humbur, duke iu nënshtruar një sërë operacionesh plastike, të cilat në fund vetëm sa e deformuan. Wildenstein nisi të thërritet me nofkën “Catwoman” (gruaja mace), për shkak të pamjes së saj të pazakontë.
Investimet e gabuara në bursë, dhe mbajtja me para e të dashurve shumë më të rinj në moshë, e falimentuan. Ajo paraqiti zyrtarisht kërkesën për falimentim në majin e vitit 2018, duke deklaruar qindra miliona dollarë borxhe. “Shpesh i drejtohem miqve dhe familjes, për të paguar shpenzimet e mia”, do të deklaronte Jocelyn për mediat. Për një kohë mbajti shpresë tek një pikturë e vjetër, që do ta shiste për të shlyer disa nga borxhet. Por edhe ajo rezultoi të ishte një blerje e kotë, pasi nuk ishte origjinale. /TIRANA TODAY
