Video ku protagonist ishte Mihal Kokëdhima, kaloi në kufijtë e çmendurisë. Pronari i një resorti ndërtuar pa leje në plazh, sulmoi familjen e miliarderit spanjoll, Eugenio Galdon. Pasi turistët u larguan nga restoranti “Panorma”, Kokëdhima u hodh mbi kofanon e furgonit, ndërsa i kërcënoi mbi 3 kilometra rrugë. Disa versione u servirën se çfarë ka ndodhur realisht brenda ambienteve të lokalit, dhe se çfarë shkaktoi tërë këtë situatë qesharake.
Gjithçka ka nisur për porosinë që turistët kanë dhënë. Ata kanë porositur 5 peshq, ndërkohë që nga restoranti është këmbëngulur t’i sillen 7 të tillë, duke thënë se ky është numri i peshqve që ata kërkuan.
Kamerierët kanë njoftuar edhe Mihal Kokëdhimën, i cili e përgatiste vetë peshkun në kuzhinë. Ai ka dalë me shpejtësi, duke shkuar i irrituar turistëve në tryezën e tyre, së bashku me zgarën me 7 peshq, e duke ia përplasur në tavolinë.
Turistët janë ndjerë të fyer nga ky veprim, dhe pas debateve dhe sulmeve edhe fizike që kanë marrë nga pronari, kanë vendosur të largohen, raporton ‘Report Tv’. Mjaft i revoltuar, Kokëdhima i ka ndjekur nga pas, duke ju hedhur mbi makinë.
Restoranti Panorma i ndërtuar në Porto Palermo të Himarës, ishte pa leje. Po kështu, Mihal Kokëdhima, 51 vjeç, rezultoi të ishte një person me precedentë penalë, për vjedhje energjie dhe ndërtim pa leje.
IKMT nisi mëngjesin e sotëm aksionin për shembjen e restorantit Panorma, pronë e Mihal Kokëdhimës, protagonistit të arrestuar pasi dhunoi turistët spanjollë.
