Të gjithëve na ka ndodhur të shohim në televizor pamje të varfërisë ekstreme në Afrikën e largët. Ndonjëherë qendrat e qyteteve na largojnë nga varfëria dhe skamja e atyre që kanë nevojë.
Në televizionin Top Channel streha e një nëne me dy vajza të sëmura. Ato jetonin në kushte më të mjerueshme se një stallë bagëtie dhe tre gratë vuajnë për bukën e gojës por edhe për mjekime. Dy djemtë që jetonin dikur së bashku me ato janë larguar. Njëri i shtruar në spital psikiatrik dhe tjetri nuk dihet se ku.
Pas transmetimit të kronikës kanë reaguar përfaqësues të organizatës “Fundjavë Ndryshe”, të cilët e ndihmuan këtë familje me nje paketë ushqimesh bazë. Ndihmë për këto tre gra që bëjnë jetë ç’njerëzore, ku mungesa e ilaçeve për vajzat e sëmura rëndon peshën e varfërisë lemeritëse. Të harruara, me duart që u dridhen nga të ftohtit dhe uria. U ka munguar çdo mbështetje dhe është koha kur lypet të bëhemi një, për të mos i lënë shikimhumbur, me sytë nga qielli.
Koordinatori i fondacionit Shkëlzen Krajku tha se urgjente është ndërtimi i shtëpisë dhe vizita e dy vajzave të sëmura.
Ndërkohë, pas kronikës televizive ka pasur shumë reagime nga qytetarët, të cilët kanë shprehur gatishmërinë për të ndihmuar financiarisht këtë familje.
“Keq jemi, pa shtëpi, do na zërë poshtë. Këtu ha, këtu rri, këtu pi. Kam dy vjet që jetoj këtu, marrim leket e këtyre, kalojmë, që hamë bukë. Pa zjarr pa dreq. Keq jemi”, thotë 70-vjeçarja Zylfie Cemeri..
Bashkëfshataret thonë se u ndihmojnë shpesh por vajzat e 70-vjecares Zylfie Cemeri kanë nevojë për përkujdesje mjekësore pasi vuajnë nga çrregullime të shëndetit mendor.
“Shteti të marrë masat se këta s’janë në gjendje për t’u ushqyer për vete. I ati u vdiq. Këto ua kemi bërë ne po kjo s’është zgjidhje”, thotë një fqinj i tyre.
“Kemi bërë të pamundurën por këto duhen çuar në një qendër të kenë përkujdesje. Nuk janë të dhunshëm. Nuk kanë nevojë vetëm për pjesën ushqimore por një strehë ku të fusin kokën”, thotë një tjetër.
Të vetmet të ardhura që familja ka janë pensioni i fëmijëve të sëmurë por nuk është i mjaftueshëm.
Ndërsa banorët i tremb e ardhmja kur ndoshta nëna e vajzave të mos jetë më.
