Halli dhe nevoja e detyron një familje që të jetojë dhe në një kasolle lopësh. Kur flasim për histori të tilla duket sikur jetojnë shumë larg nesh, por kjo familje jeton vetëm tre kilometra larg nga qendra e Tiranës.
Në Paskuqan familja e Burbuqe Bucit jeton në një kasolle ku më parë mbanin bagëtinë. Shtëpia e saj është përmbyt në muajin tetor të vitit 2017-të, prej asaj dite janë detyruar të jetojnë në kasollen e lopës. Brenda pak metrave katrore jetojnë 6 persona të kësaj familjeje. Por hapësira në kasolle ka vend vetëm për krevatet dhe jo për orenditë e tjera. Kasollja është e ndërtuar nga dërrasa të kalbura dhe rrethohet nga batanijet por sërish është shumë e ftohtë.
Rasti u publikua sonte në emisionin “Stop”, gazetarja thekson se fondacioni “Fundjavë Ndryshe” ka marrë angazhim që të bëjë këtë familje me një shtëpi të re. Nëna i bën thirrje të gjithë shqiptarëve që të kontribuojnë për të ndërtuar shtëpinë dhe të ndihmojnë “Fundjavë Ndryshe” që banesa e tyre të përfundojë sa më parë.
Sot në ditën e gruas, kjo nënë nuk siguron dot ngrohtësinë për fëmijët e saj dhe jo më të mendojë për të festuar.
“Unë jam Burbuqe Buci, jam nga Paskuqani dhe shtëpia ime është përmbytur nga shirat. Shtëpia ka qenë këtu përpara por tani është prishur. Dhe streha ime e vetme ishte këtu ke kjo barakë lopësh. Kam 6 pjesëtar në familje dhe vjetrën dhe burrin që ka pësuar tronditje nga aksidenti dhe është i paaftë për punë. Këtu 40 mijë lekë i kam këpucë, që qep këpucë me dorë dhe 52 mijë lekë përkrahje sociale. Asgjë tjetër, vjehrrën e kam të paralizuar për gati një vit. Kjo ka qenë jeta imë s’di çfarë të them tjetër.
“Fundjavë Ndryshe” më ka ndihmuar jashtë mase dhe i falenderoj shumë, aq sa nuk mund ta përcaktoj dot. Më kanë ndihmuar edhe komshinjtë. Edhe mësuesja e djalit të madh për vitin e ri ka sjellë ushqime.
Këtu i rris, këtu hamë, këtu i mbuloj me batanije kur vijnë nga shkolla, dhe bëjnë detyrat aty sepse nuk mund t’i lej. Ja dhe batanijet ku ka ranë shiu mbrëmë. Ja dhe llapma që u dogj mbrëmë dhe unë kish frikë ta ndërroja për shkak të lagështirës. Kasollja është e hapur gjithë andej, mërdhinim shumë por s’kemi çfarë të bëjmë. Kujt t’i kërkoj tjetër, vetëm “Stopit” dhe “Fundjavë Ndryshe”. Dhe kush ka mundësi tjetër të na ndihmojnë”, deklaron burbuqja.
Djali i madh i familjes tregon se “Kur dalim nga shkolla vijmë në shtëpi dhe futemi në batanije dhe rrimë në krevat sepse jashtë krevatit është shumë ftohtë, në krevat bëjmë dhe detyrat. Unë kërkoj vetëm një shtëpi që të rrijë ngrohtë sepse nuk dua që të kem ftohtë fare.”
Vajza e familjes që është dhe më e vogla, ajo i bën thirrje shqiptarëve “Unë dua një shtëpi që mos të kem ftohtë si shoqet e mija që e kanë shtëpinë e re.”
Burbuqja pasi del nga kasolle tregon për mjerimin që vijon më thellë. “Tek kjo stallë lopësh që kam unë si strehë fëmijësh nuk mund të fus dot as fëmijët e mi dhe jo më ushqime tjera. Ushqimet dhe bukën i mbaj në këtë bufe që rri në shi dhe që është prishur komplet. Dhe enët i lajë unë dhe i lan shiu përsëri. Të gjitha ushqimet janë jashtë edhe buka.”
Drejtori i fondacionit “Fundjavë Ndryshe”, Arbër Hajdari i cili vizitoj familjen i bëri atyre një premtim të madh se do tu ndërtojë një shtëpi të re.
“Burbuqja është një nga ato raste ekstreme të varfërisë që janë vetëm 3 kilometra larg nga qendra e Tiranës. Dhe ne bashkë me emisionin stop kemi vendosur që të nisim fushatën për një shtëpi të re. Juve ju tanon një shtëpi që të mos jetoni në këto kushte ekstreme. Shumë shpejt do të bëheni edhe me një shtëpi të re si është bërë me çdo rast që ne me “Stopin” kemi nxjerrë. Kjo është një thirrje për të gjithë njerëzit, ju i keni parë planet e kësaj familje, në çfarë katastrofe jetojnë, për te mos mjaftuar këto edhe problemet shëndetësore dhe një ndihmë që nuk mjafton as për tu ushqyer. Ndaj i ftojmë të gjithë njerëzit që ti përgjigjen thirrjes tonë. Dhe ta bëjmë më një shtëpi të re familjen,” deklaroi Arbër Hajdari.
