Ndërsa Admir Murataj humbi jetën në tentativë për t’u arratisur pas grabitjes së bujshme më 9 prill 2019, brenda në aeroportin e Rinasit, vëllai i të ndjerit, Cen Murataj, ka treguar jetën e panjohur të tij. Nga shkolla për pedagogji, puna si mësues, emigrimi në Greqi ku punoi si murator profesionist dhe deri tek devijimi në vitin 2014, kur sipas tij, pësoi çekuilibrime dhe iu fut botës së krimit përmes grabitjeve.
Cen Murataj ka thënë për gazetarët se Admiri ka studiuar për pedagogji. Ai tregon se i vëllai ka qenë mësues, e më pas mori gruan dhe fëmijët për në Greqi. Atje punoi si murator. Po kështu, ka folur edhe për identitetet e shumtë që kishte, që për të i kishte për shkaqe përfitimi.
“Ka qenë mësues, më tej iku nga mësuesia dhe mori gruan e tij dhe fëmijët në Greqi. Punoi atje murator, por pasi disa vitesh u rikthye i zhgënjyer nga jeta atje.
Iku nga mësues, mori nusen iku në Greqi. I thash: Vëllai ik nga Greqia është Evropa e madhe! Të jeni të bindur tek Zoti, ka filluar punën në Greqi murator, mori një magazinë supermarket për mirëmbajtje. I ka ndërruar emrat për motive përfitimi. Po nuk ishe Thanasi në Greqi nuk tu hapnin duart.
Më erdhi më tha Greqia ka marrë fund, ka rënë 16 kile në peshë, nuk e kanë njohur si njeri. Në 2014-ën ju kthye grabitjeve në shuma të mëdha. Del ajo pangopja sikur Admir Murataj”, thotë ai.
Sakaq, kujtojmë këtu se aparati celular i gjendur brenda furgonit me mbishkrimin ‘Hetimi Tatimor’, që u përdor në grabitjen e miliona eurove në Rinas, do të dërgohet jashtë vendit për të ç’koduar të gjitha bisedat dhe sms-të e kryera gjatë 6 muajve të fundit.
Ai është një celular i thjeshtë dhe i pakoduar, dhe nga kontrolli paraprak që i është bërë, ka rezultuar se nuk ka pasur të regjistruar asnjë thirrje zanore, që do të ishte me vlerë për grupin hetimor. Për këtë fakt, thanë burimet, aparati celular do të dërgohet në Izrael për të hedhur më shumë dritë mbi bashkëpunëtorët e Admir Muratajt.
Ndërkohë në brendësi të makinës që dyshohet se përdorën grabitësit e miliona eurove në Rinas, nuk janë gjetur gjurmë biologjike, që do të çonin në zbulimin e autorëve.
