Sekretari i Përgjithshëm i NATO-s, Jens Stoltenberg, deklaroi se brenda muajve të ardhshëm, Maqedonia e Veriut do të bëhet anëtare e NATO-s.
Në një prononcim për kanalin televiziv ukrainas “1+1”, Stoltenberg, foli edhe për anëtarësimin e Ukrainës në NATO.
“Maqedonia e Veriut brenda disa muajve do të bëhet anëtare e NATO-s. Askush nuk mund ta imagjinonte se Polonia dhe vendet baltike do të bëhen anëtare të NATO-s, pasi të rrëzohej Muri i Berlinit. Të gjithë aleatët kanë vendosur që Ukraina të bëhet anëtare e NATO-s. Ne do të ndihmojmë për të kryer reformat e nevojshme në mënyrë që Ukraina të anëtarësohet në NATO dhe të modernizohet shoqëria”, tha Stoltenberg.
Kujtojmë se gjatë vizitave të tij të mëparshme në Ukrainë, Stoltenberg është shprehur se dyert e NATO-s janë të hapura për Ukrainën.
