Drejtori i OBSH për Evropën, Hans Kluge është shprehur se përparimi që ka bërë kontinenti në lidhje me situatën nga koronavirusi është shumë i vogël dhe se situata është ende shqetësuese.
Edhe pse numri i viktimave ka filluar të tregojë rënie në vendet më të prekura si Spanja apo Italia, Kluge thekson se nuk ka ardhur akoma momenti për të qetësuar masat kufizuese.
“Të mendosh se po afrohemi në pikën përfundimtare do të ishte e rrezikshme. Virusi nuk lë vend për gabime ose vetëkënaqësi. Çdo ndryshim në strategjinë tonë të përgjigjes, zbutjen e statusit të bllokimit ose masat fizike të distancimit kërkon konsiderim shumë të kujdesshëm”, tha ai.
Shtatë nga dhjetë vendet më të prekura nga koronavirusi ndodhen në Evropë (Italia, Spanja, Franca, Mbretëria e Bashkuar, Belgjikë, Holandë dhe Gjermani).
Deri më tani në Evropë janë raportuar rreth 700 mijë raste infektimi, nga të cilët kanë humbur jetën 52,824 persona.
Spanja, Italia, Gjermania, Austria, Danimarka dhe Franca kanë deklaruar se po i shqyrtojnë lehtësimin e kufizimeve. Ndërsa Austria është vendi i vetëm që ka përcaktuar një datë për lehtësimet e para, pas 14 prillit.
