Kreu i Qendrës Kombëtare të Urgjencës, Skëndër Brataj, ka shuar kureshtjen nëse Shqipëria rrezikon një tjetër mbyllje për shkak të pandemisë. I ftuar në rubrikën ‘Opinion’ në ‘News24’, Brataj tha se nëse këto masa nuk do të reflektohen në këto 2-3 javë, do duhet të vlerësohen masa të tjera shtesë.
“Çdo ditë bëhet monitorimi dhe vlerësohet nëse po funksionojnë apo jo masat. Nëse këto masa nuk do të reflektohen në këto 2-3 javë, do duhet të vlerësohen masa të tjera shtesë. Përgjegjësi për shëndetin e njerëzve janë institucionet, qeveria dhe Ministria e Shëndetësisë. Javën që vjen do të bëjmë sërish një trajnim.
Të gjithë spitalet COVID dhe spitalet pediatrike, studimet ndërkombëtare janë në dispozicion të personelit mjekësor.
Janë shtuar 10 ekipe epidemiologësh. Dhe ekipet lëvizëse. Po përgatitemi për skenarët. Nuk mund të rrimë më duart lidhur.
S’ka gjë që ka filluar dhe s’ka mbaruar asnjëherë. Do të mbarojë dhe kjo pandemi. Pas 6 muajsh mund të themi se mund të bëhej kjo gjë më mirë, ose jo. Ka disa indikatorë që përcaktojnë masat. Nëse kam një bilanc të hyrje-daljeve të pacientëve, duhet të mendojmë për situatën”.
Brataj theksoi se rritja e numrit të të prekurve, ishte e pritshme në këtë periudhë. Ai shtoi më tej se s’mund të flasim për emergjencë, ndërsa aktualisht gjendemi në skenarin e dytë.
“Ne teknikët e kemi të vështirë të ndjekim hapat e politikës. Monitorimi bëhet çdo ditë dhe me çdo skenar. Skenarët janë bërë gati. Fakti që ne gjendemi akoma në skenarin e dytë, me COVID2, s’mund të flasim për emergjencë, pasi nuk është.
Ajo që po dëgjojmë kohet e fundit është; “katastrofë, vrasës, hajdut”, që po dëgjojmë në mediat tona. Për shëndetin e njerëzve duhet të thuhet qartë realiteti. Është normale që janë rritur numrat. I kemi analizuar disa herë të gjitha shkaqet. E kishim thënë për valën që do të vinte në tetor. Është folur gjithmonë. Deri tani menaxhimi po bëhet me skenarin e dytë”, tha Brataj.
