Në një intervistë nga Nju Jorku për emisionin “Opinion”, kryeministri Rama tha se sulmi kibernetik i Iranit nuk ia arriti qëllimet. Sulmin kibernetik të Iranit, Rama e konsideron si një bombardim në jetën reale. Ai bëri me dije se të gjitha hetimet e bëra nga agjencitë amerikane dhe skuadra e Microsoft zbuluan se pas këtyre sulmeve fshihet Irani. Të gjitha hetimet dhe të dhënat flasin për grupe që funksionojnë me urdhër dhe sponsorizim të Qeverisë Islamike të Iranit.
“Jemi në kushtet e një agresioni real, në jetën jo virtuale të botës digjitale ky do të ishte një bombardim. Por është një bombardim në sistemet tona digjitale, me një qëllim shumë të qartë për të zhdukur tërësisht gjithçka që ne kishim ndërtuar.
Nuk e ka arritur qëllimin. Jemi 100% të bindur, sepse është bërë një hetim shumë i thellë dhe ne kemi prova të nxjerra nga hetimi i agjencive të specializuara të SHBA-së dhe skuadrës së Microsoft.
Të gjitha hetimet dhe të dhënat flasin për grupe që funksionojnë me urdhër dhe sponsorizim të Qeverisë Islamike të Iranit”, u shpreh kryeministri Edi Rama.
