”Janë të ligjshme”/ Avokati i mjekut Prifti: Paratë u siguruan nga një shitje

Avokati i mjekut kardiolog të QSUT-së, Edvin Prifti, të pezulluar nga detyra nga SPAK në një prononcim për ”Ora News” tha se paratë që ju sekuestruan klientit të tij janë të ligjshme.

Henrik Ligori u shpreh se këto para janë siguruar nga një shitje.

”Paratë e gjetura janë të ligjshme nga një shitje. Një pjesë e tyre nuk u gjetën në zyrë, por në çantë, të cilat do t’i dërgonte në bankë për të bërë një blerje.”, tha ai.

Sipas avokatit, në aktet e dosjes nuk vërtetohet se mjeku ka marrë para, janë vetëm bisedat e kryesekretares me një shoqen e saj.

Një sasi e konsiderueshme monetare u gjet në banesën dhe në zyrën e mjekut Edvin Prifti, i pezulluar nga detyra me urdhër të Prokurorisë së Posaçme (SPAK), pas arrestimeve në Gjykatën e Krujës.

Kontrolli i kryer pasditen e të enjtes, 11 shkurt, zbuloi 250 mijë euro dhe 16 milionë lekë në zyrën dhe banesën e kardiologut të njohur.

Hetimet ndaj tij nisën bazuar në përgjimet e sekretares së Gjykatës së Krujës të cilat kishin nisur për lirimin e të dënuarve por që kanë zbuluar për Prokurorinë e Posaçme edhe korrupsionin në shëndetësi.