Trajneri aktual i skuadrës së Milanit, Marko Xhampaolo, do t’i lërë vendin në pankinën kuqezi, ish-trajnerit të Interit, Stefano Pioli. Por pavarësisht se në Itali ky është një fakt i kryer, lajmi nuk është bërë zyrtar akoma.
Mirëpo tifozët e Milanit duken të pakënaqur me zgjedhjen e trajnerit. Ata kanë shpërthyer plot zemërim në rrjetet sociale, duke publikuar meme tallëse me hashtagun #Pioliout (Pioli jashtë).
Përveç kësaj, tifozët kuqezi kanë risjellë në vëmendje një intervistë të trajnerit Pioli në vitin 2016, kohë në të cilën ai drejtonte klubin e Interit.
“Jam tifoz i Interit. Familja ime është e gjitha interiste. Pastaj, profesioni im më mori diku tjetër, por besimi im është këtu. Jam rritur me korin “me Bekalosin dhe Pasinaton do fitojmë kampionatin”, deklaronte Pioli në vitin 2016.
