Gjykata e Posaçme ka shtyrë për të premten tjetër, seancën ndaj ish-ministrit të Mjedisit Lefter Koka, për lirimin nga qelia. Gjatë seancës së sotme, gjykata administroi akt-ekspertimin e mjekëve ligjorë, mbi gjendjen shëndetësore të Kokës.
Sipas akt-ekspertimit, Lefter Koka është në gjendje të rëndë shëndetësore dhe ka probleme të rënda me zemrën. Ai kërkon zbutjen e masës “arrest në burg” dhënë për llogari të hetimit të inceneratorit të Fierit.
Kujtojmë se dy javë më parë, Gjykata e Posaçme refuzoi kërkesën e Kokës për ndryshimin e masës “arrest në burg” të caktuar për inceneratorin e Elbasanit.
Ish-ministri i Mjedisit, Lefter Koka, kërkon heqjen e masës së sigurisë “arrest me burg” për inceneratorin e Fierit. Koka është pas hekurave pasi hetuesit kanë arritur të faktojnë nga provat e deritanishme se përfitoi 1.2 milionë euro për inceneratorin e Fierit.
Ndërkohë ndaj ish-ministrit është edhe një masë tjetër “arrest me burg” për inceneratorin e Elbasanit, për të cilin SPAK përfundoi hetimet vetëm pak ditë më parë. SPAK e akuzon Lefter Kokën për “shpërdorim të detyrës”, “pastrim të parave” dhe “korrupsion”.
