Qeveria e kryeministrit të Malit të Zi, Dritan Abazoviç është rrëzuar me 50 vota pro dhe 1 kundër. Seanca zgjati gati 13 orë ku janë shkaktuar debate të ashpra mes Abazoviçit dhe opozitës. Pas shkarkimit të qeverisë malazeze, Abazoviç tha se shumë gjëra janë më të qarta, teksa përgëzoi koalicionin e ri të Aleks Beçiqit dhe Milo Gjukanoviqit, duke shpresuar që shpejt të bien dakord për një qeveri të re.
“Ne jemi të gatshëm të dorëzojmë kompetencat. Kjo është qeveria më gjithëpërfshirëse që ka ekzistuar ndonjëherë, ata nuk kanë pasur qëndrim revanshist ndaj askujt. Unë do të doja që çdo e ardhshme të ishte e tillë”, tha Abazoviç në një konferencë për shtyp në Parlamentin e Malit të Zi.
Ai tha se i vjen keq që krimi i organizuar ende përdor tentakulat për të menaxhuar marrëdhëniet politike, raporton rtcg.
“Unë jam krenar për gjithçka që kemi bërë në 100 ditë. Ne do të kujtohemi si qeveria më jetëshkurtër. Ne do të bëjmë gjithçka që qeveria që do të formohet pas zgjedhjeve ta dërgojë Malin e Zi në BE”, tha Abazoviç.
Ai tha se URA nuk do të marrë pjesë në Qeveri nëse formohet para zgjedhjeve. “Ky është qëndrimi i SNP-së, siç e kuptoj unë, ne kemi ndenjur shumë në tavolinë, kemi formuar dy qeveri, është logjike që dikush tjetër të marrë iniciativën. Le ta bëjnë Beçiq, Gjukanoviq dhe Shehoviq shumicën e re”, deklaroi Abazoviç.
