Konfirmohet në detyrë prokurori i Apelit në Vlorë, Kleanth Zeka. Trupa gjyqësore që kreu procesin e rivlerësimit për prokurorin Zeka u përbë nga Etleda Çiftja, kryesuese, Firdes Shuli relatore dhe Roland Ilia anëtar.
Procesi i Vetting-ut për Zekën u bë në të tri kriteret e rivlerësimit, atë të pasurisë, pastërtisë së figurës dhe profesionalizmin. Ai e ka nisur karrierën si oficer i policisë gjyqësore, dhe më pas është emëruar si prokuror në Vlorë.
Në qershor 2014, Zeka është promovuar në detyrë si prokuror i Apelit të Vlorës, detyrë të cilën e ushtron edhe aktualisht.
Ai u përball të mërkurën me Komisionin e Pavarur të Kualifikimit. Në fund të seancës dëgjimore, prokurori kërkoi konfirmimin e tij në detyrë. “Kam plotësuar kuadrin pozitiv për të tri kriteret. Jam familjar, i mbyllur dhe jo i qejfit, duke shmangur kështu kontaktet e papërshtatshme si edhe kam burime të ligjshme”.
