Ish-ministri i Punëve të Jashtme të Kosovës, Petrit Selimi ka njoftuar se përveç ministrit të Mbrojtjes së Serbisë Aleksandër Vulit, edhe disa zyrtarë të tjerë serbë e kanë të ndaluar të hyjnë në Kosovë.
Nëpërmjet një postimi në Twitter, Selimi ka publikuar një dokument të cilin shprehet se e ka firmosur vetë, për të mos lejuar zyrtarët serbë të kalojnë kufijtë kosovarë.
“Ministri i Mbrojtjes së Serbisë, Aleksandar Vulin, që njihet për gjuhën fyese dhe raciste kur iu drejtohet shqiptarëve është duke u ankuar që ai nuk po lejohet të hyjë në Kosovë. Të gjithë ministrat serbë të Mbrojtjes dhe të Brendshëm e kanë të ndaluar hyrjen në Kosovë. E di këtë, sepse unë e kam nënshkruar ndalesën”, shkruan Selimi.
Ndërkohë, mediat kosovare raportojnë se Selimi ka publikuar në Twitter, një dokument nga koha kur ishte ministër i Punëve të Jashtme, ku ka nënshkruar një vendim në vitin 2016. Ky vendim iu ndalon hyrjen në Republikën e Kosovës, bartësve të funksioneve të ministrave-ministreve të Ministrisë së Punëve të Brendshme të Serbisë dhe Ministrisë së Mbrojtjes të Serbisë, përderisa nuk pranojnë ftesë zyrtare dhe individuale nga homologët e tyre në Republikën e Kosovës.
