Çudirat shqiptare nuk marrin fund asnjëherë. Përveç modifikimeve dhe mini-shpikjeve të vogla “Made in Albania”, për shkak të pamundësive financiare, çudisim botën edhe me listat zgjedhore.
Nga ajo që shohim në listat e disa partive tregojmë se nuk dimë të dalim jashtë veprimeve fisnore. Pesë fëmijët e Dhimitri Buzakës kandidojnë për partinë MEGA dhe katër fëmijët e Vesel Abazit kandidojnë për partinë liberale PAD.
Me sa duket këto dy fise janë të rëndësishme për dy partitë e lartpërmendura sepse në MEGA janë 15 kandidatë me mbiemrin Buzuka, ndërsa në PAD janë 15 të tillë me mbiemrin Abazi. Listat e dy partive u publikuan nga “Instituti i Studimeve Politike”.
Padyshim që këto janë dy raste unike, kur kryetarët e dy partive vendosin emrat e gjithë fisit si kandidatë për zgjedhjet e 18 qershorit në Shqipëri.
