Gjykata caktoi të shtunën masat e sigurisë për katër të arrestuarit, për publikimin e databazës me pagat e qytetarëve. Kështu, gjykata vendosi të lerë në “arrest shtëpie” tre prej tyre, ndërsa një tjetër në “detyrim paraqitje”. Dy specialistët e IT, Eni Qirjako dhe Andi Agaraj të punësuar te AKSHI dhe që ushtronin detyrën në Drejtorinë e Përgjithshme të Tatimeve, akuzohen nga prokuroria se ia shitën të dhënat dy punonjësve të bizneseve private Klodian Sota dhe Endri Ikonomi. Këta katër shtetas u arrestuan javën e shkuar nga Prokuroria e Tiranës, për publikimin e rrogave dhe të dhënave personale të mbi 650 mijë qytetarëve shqiptarë.
Artan Gjermeni është gjyqtari i cili liroi nga qelia të arrestuarit që nxorrën të gjithë të dhënat personale të mbi 650 mijë qytetarëve.
Por kush është gjyqtari Artan Gjermeni?
Ai është prej vitesh në sistemin e drejtësisë, ndërsa ende nuk ka kaluar në filtrin e vettingut. Artan Gjermeni ka një karrierë të gjatë, ndërsa ka gjykuar dosje të rëndësishme. Ai është i njohur si kryetar i Gjykatës së Lushnjës, pas viteve 2000, kur aty u zhvilluan gjyqet për “Bandën e Lushnjes”. Për vendimet e dhëna ai u akuzua nga Partia Demokratike si i lidhur me Aldo Baren, shkruan “shqiptarja”.
Në vitin 2006, nisi një procedim disiplinor nga Këshilli i Lartë i Drejtësisë me kërkesë të ministrit të asaj kohe të Drejtësisë Aldo Bumçi. Ai e akuzonte Gjermenin që tashmë kishte kaluar në gjykatën e Kavajës dhe që mbante edhe detyrën e anëtarit të KLD-së për shkelje në detyrë dhe për parregullsi në deklarimin e pasurisë. Gjermeni i shpëtoi shkarkimit, pasi KLD votoi në favor të tij. Megjithatë ai u largua nga Kavaja në Elbasan, ku qëndroi deri në vitin 2011.
Me një vendim të KLD-së, Gjermeni kthehet në Tiranë në Gjykatën e Shkallës së Parë, detyrë që e mban edhe sot. Ai ka qenë pjesë e çështjeve të rëndësishme. Një prej tyre ishte çështja ndaj Konstandin Xhuvanit, djalit të ish-deputetes së PS-së, Luiza Xhuvani ku Gjermeni ishte pjesë e trupës së gjykimit. Xhuvani i shpëtoi burgut të përjetshëm ndërsa çështja është në gjykim në shkallët e tjera. Si gjyqtar ai ka qenë edhe në Kolegjin Penal në çështjen në ngarkim të ish-guvernatorit Fullani.
Në janar të vitit 2016, opinioni publik u trondit pas raportimit për plagosjen e një gjyqtari. Mediat raportuan në kohë rekord, për plagosjen e gjyqtarit Artan Gjermeni. Ky i fundit, u tha se ishte paraqitur në spital me plagë në formë therjeje. Mediat cituan bluzat e bardha, të cilët konfirmonin rastin, duke deklaruar se gjyqtari Gjermeni ishte paraqitur me traumë shpuese në hapsirën ndërbrinjore, por pa depërtuar në mushkëri, duke shtuar më tej se këto plagë janë tipike si ato që shkaktohen nga armët e ftohta. Ajo çfarë e komplikoi më tepër këtë ngjarje, ishte gjetja nga policia e një sasie parash në automjetin e Gjermenit.
Në vendin e ngjajes, përveç gjurmëve të gjakut, policia gjeti në automjet edhe shumën e 18 mijë e 760 euro, si dhe një shumë prej 285 mijë lekësh të reja. I pyetur për paratë e sekuestruara, gjyqtari tha se ishin të ardhura të familjes. Për këtë rast, hetimet i kaluan Prokurorisë së Durrësit, e cila vetëm pak kohë më pas dhe konkretisht në muajin prill të vitit 2016 i mbylli hetimet. Paraprakisht, gjyqtari i Tiranës, Gjermeni nuk kishte pranuar që kjo çështje të hetohej.
Me këtë argument si dhe me raportin e ekspertëve mjeko-ligjorë për plagë shumë të lehta, Prokuroria e Durrësit ka mbyllur hetimet për veprën penale të “Plagosjes së lehtë me dashje”, e referuar nga policia e Tiranës. Gjithashtu, e njëjta Prokurori vendosi që të zhbllokojë edhe shumën e parave 18 mijë e 750 euro dhe 250 mijë lekë të reja, që iu sekuestruan gjyqtarit Artan Gjermeni në makinën e tij tip “Smart”.
Nëse i referohemi pasurisë së gjyqtarit Gjermeni, të paktën asaj që ka deklaruar pranë ILDKPI –së, për vitin 2016, rezulton se gjyqtari Artan Gjermeni rezulton pronar i një kompleksi sportiv, i një bar kafeje, dhe i pronave të patundshme, që sipas tij i ka të trashëguara.
Në vitin 2016 ai ka deklaruar:
Llogari bankare në gjendje 53.82 lekë është shtuar me shumën 3.489.181 lekë.
Llogari bankare të bashkëshortes në shumë 22.03 lekë.
Depozitë me fond prestigj në vlerën 18.586.203 lekë, depozitë të bashkëshortes, kthyer në fond prestigj, është në vlerën 16.537,246 lekë.
Llogari rrjedhëse në bazë të pagës dhe shpërblimeve në vlerën 1.049.271 si dhe një kartë krediti në shumën 50.000 lekë.
Llogari rrjedhëse në vlerën 4 438 lekë si dhe një tjetër llogari rrjedhëse në 13,138.38 lekë, në emër të djalit.
Llogari rrjedhëse në emër të bashkëshortes si person fizik, notere në shumën 319.188 lekë.
Shtëpi banimi me sipërfaqe 74 metra katrorë në qytetin e Lushnjes, fituar me dëshmi trashëgimie.
Tokë bujqësore me sipërfaqe 1856 metra katror, në fshatin Krutje, fituar me dëshmi trashëgimie.
Truall+ndërtesë (terren sportive i mbuluar me dhoma zhveshje, një kat me sipërfaqe 56 metër katror, me sipërfaqe 1092 metër katror.
Truall, sipërfaqe 450 metër katror+ndërtesë (bar, kafe një kat me sipërfaqe 90 metër katror), blerë në vitin 2003.
Të ardhura nga paga si gjyqtarë dhe nga shkolla e magjistraturës në vlerën 1.372.551 lekë.
Kthyer në depozitë bankare, pagat pas vitit 2011. Është në shumën 2.675.044.40 lekë dhe 2.651.707.89 lekë.
Të ardhura nga paga e bashkëshortes së notere në shumën 5.111.297 lekë.
Të ardhura nga paga e djalit si këshilltar ligjor pranë Shega-Trans. Të ardhura nga qiraja e dyqanit në Tiranës me sipërfaqen 40 metër katror në vlerën 120.000 lekë.
Të ardhura nga qiraja e zyrës në Lushnjë në vlerën 210.000 lekë.
