Figurat politike që kanë reaguar për vdekjen e Gjovalin Kadelit duke shprehur ngushëllimet dhe dhimbjen e tyre. Publikisht janë shprehur Monika Kryemadhi, Petrit Vasili dhe Edi Rama.
Monika Kryemadhi: Ti ike nga ne, por ne nuk do të të harrojmë kurrë, sepse nuk mund te largohesh kështu. Ne nuk do të të harrojmë kurrë!
Petrit Vasili: Lajmi për mikun e shtrenjte Gjovalin na thau zemrën. E përcolla dhe buzëqeshja e tij përpara se te hipte ne avion nuk mendoja kurrë se do te ishte e fundit. Do te kemi ne mendje gjithë jetën miku ynë i dashur.
Kryeministri Rama: Miq, kundërshtarë, kolegë, po pavarësisht dallgëve në marrëdhëniet tona, Gjovalini ishte gjithnjë për mua njeriu i admirueshëm për ambicien e tij dhe faktin se nga hiçi, ai u bë me përpjekje e sakrifica të mëdha, një personalitet publik i Lezhës. Me keqardhje thellësisht të sinqertë, mora lajmin për vdekjen e tij dhe nuk gjej fjalë për të ngushëlluar fëmijët që pas nënës humbën edhe babanë… U prehsh në paqe Kadel!
Ilir Meta: Me pikëllim dhe trishtim të thellë mësuam për ndarjen nga jeta të mikut, shokut dhe kolegut tonë të dashur Gjovalin Kadeli.
Kjo ndarje e parakohshme dhe e padrejtë nga jeta e deputetit Gjovalin Kadeli është një dhimbje e madhe për të gjithë kolegët e tij të Kuvendit të Shqipërisë.
Ajo është një humbje e pazëvendësueshme për fëmijët e tij, për familjarët dhe të afërmit, për shokët e miqtë e tij të panumërt dhe për të gjithë përkrahësit e tij të përkushtuar në Lezhë, Kurbin, Mirditë e në gjithë Shqipërinë.
Ndonëse nuk do të jetë më mes nesh, me shumë dashuri, mirënjohje dhe respekt miku e shoku i dashur Gjovalin do të mbetet në kujtesën tonë dhe në mendjen e të gjithë atyre të çilët ndanë me të jo vetëm humorin tij të çasteve të gëzuara por edhe vëmendjen dhe përkushtimin e tij ndaj halleve e problemeve të jetës së njerëzve të thjeshtë.
I përjetshëm qoftë kujtimi i mikut, shokut e kolegut tonë Gjovalin!
U prehtë në paqe shpirti i tij!
Ndarja nga jeta e deputetit të LSI-së, Gjovalin Kadelit ka tronditur botën e politikës. Karriera e tij ka nisur si deputet i PS, (2009-2013) ndërkohë që në 2013-ën e futi PD në listat e saj. Më pas, ai kaloi me Lëvizjen Socialiste për Integrim, ndërsa si deputet ka shërbyer në dy legjislatura.
