Kryeministri i Izraelit, Benjamin Netanyahu i ka hedhur ‘benzinë’ zjarrit me një deklaratë të bërë ditën e sotme, ku tha se sulmet në Gaza do të vazhdojnë dhe se asgjë nuk ka mbaruar.
Dhuna po përhapet edhe në Bregun Perëndimor dhe sot ka pasur incidente në kufijtë jordanezë dhe libanezë, shkruan The Times of Israel.
“Ata sulmuan kryeqytetin tonë, ata qëlluan me raketa në qytetet tona. Ata po paguajnë dhe do të vazhdojnë të paguajnë shtrenjtë për këtë. Nuk ka mbaruar akoma”, tha ai pas konsultimeve të sigurisë në selinë e ushtrisë në Tel Aviv.
Netanyahu falenderoi Presidentin e SHBA Joe Biden, Presidentin e Francës Emmanuel Macron, Kryeministrin e Mbretërisë së Bashkuar Boris Johnson, Kancelaren gjermane Angela Merkel dhe të tjerët që kanë ofruar mbështetjen e tyre.
Konflikti mes Palestinës dhe Izraelit vijon të përshkallëzohet Izraeli ka dërguar 7 mijë ushtarë, tanke dhe armatime për të sulmuar palestinezët e Hamas që ndodhen në Gaza.
Përplasjet kanë nisur që prej të hënës dhe deri më tani bilanci është 119 viktima, mes tyre 31 fëmijë dhe 830 të plagosur.
