Policia e Fierit ka bërë të mundur ndalimin e një 37-vjeçari, ku nga kontrolli i ushtruar në mjetin e tij, i janë gjetur një sasi e konsiderueshme lekësh. Në fillim, shtetasi me inicialet K.B., nuk i është bindur urdhërit të uniformave blu për të ndaluar, e më pas është ndjekur prej tyre.
Nga Specialistët për Hetimin e Krimit Ekonomik e Financiar në Drejtorinë Vendore të Policisë Fier, u procedua penalisht shtetasi K.B, 37-vjeç, banues në Fier.
“Në datën 21.07.2018, në lagjen “1 Maji” Fier, në vendin e quajtur “Rotondo e Kryqëzimit të Parkut”, duke drejtuar mjetin tip “Benz”, nuk i është bindur urdhrit të punonjësve të policisë, në pikë kontrolli dhe mbasi është ndjekur e ndaluar nga shërbimet e policisë, iu gjetën e sekuestruan në cilësinë e provës materiale 30.450 euro, për të cilat nuk dha shpjegim për origjinën e tyre”.
Materialet i kaluan Prokurorisë pranë Gjykatës së Shkallës së Parë Fier, për veprat penale “Pastrimi i produkteve të veprës penale” dhe “Mosbindja ndaj urdhrit të punonjësit të policisë së rendit publik”.
