Gjithmonë jemi kujdesur për ta qëruar mirë kivin, por ja që paskemi gabuar, pasi kemi humbur shumë vlera ushqyese. Kërkuesit janë të mendimit se lëkura është mjaft e vlefshme për shëndetin tonë, ndaj duhet konsumuar dhe ajo pasi të lahet mirë.
Studimet e kohëve të fundit kanë treguar se lëkura e kivit duhet ngrënë, pasi na siguron më shumë vitamina dhe vlera ushqyese sesa vetë tuli. Por si mund të ushqehemi me këtë lëkurë të ashpër? Edhe në këtë drejtim kërkuesit e kanë një zgjidhje. Shkencëtarët pohojnë se ka disa mënyra si të pastroni pushin e lëkurës së kivit, dhe më pas të përfitoni prej saj.
Nëse ju duket e pamundur të hani lëkurën e kivit, mënyra më e mirë është që frutin ta shtrydhni me lëkurë.
Kaliumi që gjendet me shumicë tek lëkura e kivit, mund të rregullojë nivelin e hormoneve, presionin e gjakut dhe funksionin e enëve të gjakut. Kivi dhe lëkura e tij është e pasur me antioksidantë të fuqishëm, flavonoids të cilat janë substanca kimike që gjenden tek frutat me ngjyra të gjalla dhe kanë veti anti-alergjike, anti-kancer dhe anti-inflamatore. Lëkura e kivit mund të përmirësojë shëndetin kardiovaskular, dhe është e pasur me vitamina A, C dhe E.
