Botërori “Rusi 2018” duket se do të ketë vend edhe për kombëtaren italiane, pasi është hapur një skenarë konkret. Është Peruja e cila rrezikon pjesëmarrjen për shkak të një projekt-ligji që është hedhur për miratim, i cili do të thyente rregullat e FIFA-s në lidhje me pavarësinë e Federatave të Futbollit. Ky lajm ndez shpresat për Italinë, të cilët duket se do të jenë të përzgjedhurit për ta zëvendësuar, në rast se do të merret një vendim që do ta përjashtojë.
Deputetja peruane, Paloma Noceda ka dorëzuar për miratim një projektligj që e vendos Federatën Peruane të Futbollit, nën varësinë e Institutit peruan të Sportit, që ka funksione ministrore në këtë shtet. Pikërisht ky fakt, është i papranueshëm nga FIFA, që kërkon pavarësinë e Federatave të Futbollit, nga institucionet shtetërore me funksion ministror. Projekt-ligji pritet të kalojë për votim së shpejti dhe nëse miratohet, atëherë hapet rruga për pjesëmarrjen e Italisë në Botëror.
