Italia po bën përpjekjet e radhës, për të dalë sadopak nga izolimi. Trendi në rënie i personave që kanë humbur jetën nga koronavirusi, ka shtuar shpresat se diçka po ndryshon. Por autoritetet kanë disa plane, për të mos zgjatur karantinimin.
Italia po përgatitet për hapjen pas izolimit, dhe ditëve të vështira që përjetoi nga Covid-19. Pasi faza e parë është bërë publike, ekspertët po ideojnë edhe fazën e dytë të hapjes.
Instituti i Shëndetit ka bërë me dije se edhe në fazën e dytë, masat do të jenë të rrepta, e kryesisht masat për distancim fizik.
Më tej ekspertët kanë bërë me dije se në rast se do të ketë një shpërthim të dytë, menjëherë do të shpallet “zonë e kuqe”.
Kërkuesit i mëshojnë fort faktit se kur të nisë edhe hapja, çdo veprim do të jetë i kontrolluar, për ti shpëtuar kështu mundësisë për një shpërthim të dytë të pandemisë.
Po kështu, është tejet e largët ideja për një sezon turistik. Për këtë, kërkuesit janë mëse të bindur!
