Ndonëse Italia është e izoluar, shifrat nuk po njohin trend në ulje. Italia gjendet nën shtetrrethim nga ora 22:00 deri në 5 të mëngjesit. Mjekët japin alarmin se nevojiten masa drastike të tilla sikurse një bllokim total, për të shmangur mbingarkesën e spitaleve në fund të dhjetorit dhe të janarit, me pacientët e sëmurë nga koronavirusi dhe gripi i zakonshëm.
Shoqata italiane e mjekëve dhe e kirurgëve, ka bërë thirrje për një bllokim mbarëkombëtar. Presidenti i shoqatës, Filippo Anelli, ka shprehur shqetësimin për kolaps të sistemit shëndetësor.
“Mesatarisht, gjatë javës së kaluar kemi regjistruar 1.000 pacientë të hospitalizuar për një ditë, 110 në kujdes intensiv, 25 mijë në izolim shtëpiak dhe 300 viktima në një ditë”, u shpreh ai.
Nëse kjo tendencë mbetet e pandryshuar, atëherë në një muaj do të mund të regjistrohen 10 mijë viktima të tjera dhe do të tejkalohet pragu i 5.000 shtretërve në kujdesin intensiv, sipas presidentit të shoqatës.
“Skenari që qëndron përpara është dramatik, jo vetëm për trajtimin e pacientëve me COVID-19, por mbi të gjitha për trajtimin e të gjithë pacientëve me sëmundje të tjera”, theksoi Anelli.
