Prokuroria italiane i dërgon prokurorisë tonë listën me 30 punonjës të policisë shqiptare që janë të implikuar në trafikun e drogës që drejtonin grupi i Habilajve. Sipas burimeve për Tirana Today të janë në hetim drejtues dhe efektive të policisë shqiptare që kanë mbështetur dhe favorizuar grupin e Habilajve për trafikun e drogës, në mes tyre është dhe ish-ministri i Brendshëm Saimir Tahiri. Po ashtu nën hetim janë dhe familjarët e Habilajve në Vlorë që kanë mbështetur dhe favorizuar grupin e Habilajve për trafikun e drogës
Ka të dhëna të mjaftueshme se 30 personat që janë nën hetim kanë bashkëpunuar me grupin kriminal te Habilajve në trafikun e drogës, apo që kanë favorizuar këtë grup. Sipas burimeve tona shumë shpejt mund të ketë edhe arrestime. Mësohet se këta emra janë evidentuar nga autoritetet italiane të hetimit dhe i janë përcjellë palës shqiptare. Burimet saktësojnë se mes këtyre emrave ka drejtues të larte në policinë e Vlorës, atë të Fierit, të Delta Force dhe të policisë kufitare në Portin e Vlorës. Bëhet fjalë për persona që kanë drejtuar në këto sektorë që nga viti 2013 dhe deri pak dite më parë kur autoritetet italiane mbyllën hetimet paraprake për grupin e drejtuar nga Moisi Habilaj dhe kryen arrestimet.
Përgjimi i Moisi Habilaj dhe pjesës tjetër të grupit, të arrestuar pak ditë më parë me urdhër të prokurorisë së Katanias, kishte nisur paralelisht në të dy shtetet, Italian dhe atë shqiptar, por në të dy rastet nga pala italiane.
Një pjesë e këtyre përgjimeve të cilat ndodhen në dosjen voluminoze prej 416 faqesh, të hetimit nga autoritete italiane, ishin realizuar edhe në qytetin e Vlorës. Pala Italiane ka qenë totalisht kundër që survejimet, përgjimet dhe filmimet ti kryenin homologët e tyre Shqiptare. Ky vendim ishte marrë pasi, autoritetet përtej Adriatikut i frikësoheshin një dekonspirimi të mundshëm që mund të bënin drejtues të caktuar të policisë së shtetit.
Rasti konkret lidhet me Moisi Habilaj ku, në përgjimet e bisedave te tij me Sabaudin Çelaj përmendet edhe Ministri i Brendshëm i asaj kohe, Saimir Tahiri, si i afërm e Habilajve. Burime nga grupi hetimor saktësojnë se, autoritetet italiane kanë përgjuar për më shumë se një vit në territorin Shqiptar, ku kishin dërguan oficerë të interforcës. Sipas dosjes që përmban dhe këto përgjime Në 14 tetor të 2013, Moisi Habilaj ishte përgjuar në afër banesës së tij në qytetin bregdetar, shkruan ABCnews. Moisiu flet me zë të ulët me një shtetase me emrin Romina dhe biseda ishte regjistruar gjatë kohës kur ata po bënin xhiro afër spitalit të qytetit të Vlorës. Ndërsa një tjetër përgjim ishte kryer një ditë më vonë ndërmjet Maridian Sulaj dhe Sabaudin Çelaj. Ata flasin me mesazhe ndërmjet tyre, teksa përgjimet janë kryer përsëri në territorin shqiptar.
Prokuroria e Krimeve të Rënda ka nisur hetimin pasuror ndaj vëllezërve Habilaj në Vlorë dhe rrethit të tyre familjar, në bazë të ligjit Antimafia.
Po sipas këtyre burimeve, hetimi pasuror nisi pas arrestimit në Itali të Moisi Habilaj dhe bashkëpunëtorëve të tjerë në trafikun e drogës.
