Dy të rinj shqiptarë të cilët paguheshin për mirëmbajtjen e plantacioneve me drogë, kanë rënë në prangat e policisë italiane. Bëhet fjalë për dy shtetas 28-vjeçarë, të cilët u pikasën pas zbulimit të një plantacioni me marijuanë, në një zonë të pyllëzuar në San Sebastiano, përgjatë brigjeve të lumit Po. Shqiptarët ishin punëtorë në plantacionin e drogës, ku njëri mendohet se kujdesej për drogën, ndërsa tjetri bënte rojen. Bëhet fjalë për shtetasit Artur Kurti dhe Massimo Vlashi, të dy të pastrehë.
Policia, pas një kontrolli të imtësishtëm ka zbuluar 391 bimë narkotike në një lartësi prej dy metrash, të cilat u gjetën të mbjella në vazo.
Policia ka dyshime se të rinjtë ishin punësuar nga një grup kriminal, dhe po punon për identifikimin e personave të tjerë të përfshirë në rrjet.
Nga ana e policisë u sekuestruan gjithashtu 4 kg marijuanë në proces tharje, 3 kg marijuanë e tharë gati për shitje, si dhe materiale të ndryshme për kultivimin, prodhimin dhe shitjen e narkotikëve.