Kreu i Mbrojtjes Civile, Angelo Borrelli është shprehur se në 24 orët e fundit në Itali janë shtuar 3,836 raste të reja, duke e çuar në 139,422 numrin total të rasteve.
Kurba duket të jetë në rritje sërish, pasi në dy ditët e mëparshme numri i rasteve ishte në rënie (përkatësisht të hënën 3,599 ndërsa dje 3,039).
Por një lajm i mirë është se në 24 orët e fundit në Itali janë shëruar 2,099 persona, numri më i madh ky i shënuar ndonjëherë.
Gjithsej në Itali që nga shpërthimi i COVID-19 janë shëruar 26,941 persona. Edhe numri i viktimave ka shënuar një ulje të ndjeshme: nga 604 që u shënuan dje, sot u regjistruan 542 viktima.
Kështu numri total i viktimave në Itali shkon në 17,669. Aktualisht në vendin fqinj janë mbi 95 mijë raste ende aktive.
Italia vijon të mbetet vendi me numrin më të madh të viktimave nga koronavirusi.
