Italia ka shënuar një rritje të numrit të viktimave gjatë 24 orëve të fundit, në krahasim me një ditë më parë.
Sipas autoriteteve shëndetësore, në 24 orët e fundit janë shënuar 11 viktima, ndërsa dje u regjistruan vetëm 5.
Në rritje edhe numri i të infektuarve, 181 kundër 170 të bilancit të mëparshëm, ku ndikon gjithsesi një numër më i madh testimesh. Shifrat e rasteve të reja në Itali janë të përafërta me ato të vendeve të Ballkanit Perëndimor. Ndonëse në mars dhe prill, vendi ishte epiqendra e koronavirusit, tashmë rastet e reja ditore janë disa herë më të ulëta se ato në Kosovë dhe Maqedoninë e Veriut.
Aktualisht në Itali janë 12.609 raste aktive me Covid-19, ku prej tyre 40 janë në terapi intensive dhe 749 ndodhen të shtruar në spital, ndërsa pjesa tjetër në vetë-izolim shtëpiak.
Deri më tani, në vendin fqinj janë regjistruar më shumë se 246 mijë raste infektimi dhe mbi 35 mijë viktima.
