Një 95-vjeçare, është personi më i vjetër i shëruar nga koronavirusi në Itali.
E moshuara u diagnostikua me COVID-19 në fillim të marsit, dhe u shtrua në spital me urgjencë.
Mirëpo me kalimin e ditëve, Alma Clara Corsini, nga Fanano, arriti t’i mposhte dalëngadalë simptomat e koronavirusit dhe tashmë ka rezultuar negative.
“Po, po, unë jam mirë tani. Ata që u kujdesën për mua ishin njerëz shumë të mirë dhe tani do të më dërgojnë në shtëpi”, është shprehur 95-vjeçarja.
Kujtojmë se nga dita në ditë, në Itali po shtohet numri i të vdekurve.
“Ditët e fundit shifrat ishin të tmerrshme: 427, 627, 793… Ka raste kur vdesin të gjithë të vendosurit në ndonjë azil për pleq, apo gjysma e banorëve të ndonjë fshati në afërsi të Alpeve. Po vdesin mjekë, forcat sanitare, priftërinj. Vdekja ka përfshirë shumë vende të Evropës.
Pamjet nga veriu i Italisë janë të tmerrshme. Automjetet ushtarake ngarkohen në Bergamo në mbrëmje me kufoma të të vdekurve nga virusi Corona dhe largohen e shkojnë pjesërisht deri 100 kilometra larg, në qytete të tjera.
Krematoriumi lokal nuk ka kapacitete të mjaftueshme për të djegur të gjitha viktimat në Bergamo. Rajoni është i mbingarkuar nga numri i madh i të vdekurve”, shkruan DW.
