Dy djem janë gjetur të vdekur, njëri prej të cilëve shqiptar, në një gurore në Itali, në Acquasanta të qytetit të La Spezias. Sipas mjekëve ligjorë, vdekja daton të paktën tre ditë më parë, ndërsa në trupin e të rinjve nuk janë gjetur shenja dhune.
Mediet italiane shkruajnë se mund të kemi të bëjmë me një aksident, pasi të rinjtë mendohet se kanë rënë nga lart rrugës bregdetare që çon në Cinque Terre, nga një lartësi prej 40 metrash.
Një nga të rinjtë është identifikuar si shqiptari Fabiol Kycyku, 19 vjeç. Familjarët e tij kishin denoncuar zhdukjen e të riut, madje e kishin publikuar rastin edhe në emisionin “Chi l’ha visto” (Kush e ka parë).
Rasti po hetohet nga policia, ndërsa nuk dihet identiteti i viktimës tjetër.
