Me anë të një postimi në Twitter, selia diplomatike e SHBA, ka njoftuar se shkrimtarit Kadare do t’i jepet Çmimi Ndërkombëtar Neustadt për Letërsinë. Për shkak të situatës së rënduar me pandeminë, ceremonia e dorëzimit të çmimit do të mbahet virtualisht.
Çmimi Ndërkombëtar Neustadt për Letërsinë është një vlerësim që bëhet një herë në dy vite, dhe sponsorizohet nga Universiteti i Oklahomës dhe botimi i tij ndërkombëtar “World Literature Today”.
Çmimi Neustadt gëzon respekt të lartë në komunitetin e letërsisë për vlerësimin e krijimtarisë së shkëlqyer. Ky çmim shpesh quhet “Nobeli amerikan” për shkak të reputacionit të krijuar, duke i paraprirë përzgjedhjes së përvitshme të Akademisë Suedeze.
