Islanda nuk është thjesht një kujtim i hidhur për Kombëtaren shqiptare sa u përket rezultateve që ka marrë në ndeshjet e luajtura në Rejkjavik.
Shteti i vogël ishullor ka rezultuar një ters i vërtetë dhe për më tepër një rast i frikshëm për kuqezinjtë kur bëhet fjalë për udhëtimin në kthim nga Rejkjaviku në Tiranë. Mund të duket e çuditshme, por Kombëtares i ndodhi më 8 qershor 2019 në aeroportin e Islandës e njëjta gjë si më 11 shtator 2013 (pas ndeshjes Islandë-Shqipëri 2-1). Mirëpo, këtë herë paniku ishte edhe më i madh.
FSHF kishte shpenzuar rreth 70 mijë euro për një avion çarter, teksa menjëherë pas ndeshjes do të bëhej edhe udhëtimi Rejkjavik-Tiranë, që zgjaste 5 orë e 40 minuta. Gjërat nuk shkuan sipas parashikimeve në mbrëmjen e 8 qershorit, pasi lojtarët dhe stafi u desh të sfiliteshin sa në autobus dhe aeroport, duke pritur afro 8 orë për t’u nisur drejt Shqipërisë.
Por, kur kanë kaluar tri ditë nga ai udhëtim i frikshëm, zbulohet tashmë edhe prapaskena e zvarritjes. Është vetë institucioni i futbollit shqiptar, që përmes drejtorit për marrëdhënieve me publikun në FSHF, Andi Verçani, sqaron vuajtjet në kthim të Kombëtares dhe për më tepër arsyen që solli këtë pritje të çmendur. Vonesa kishte një shkak madhor: avioni çarter ishte me defekt dhe autoritetet islandeze kapën gjithçka në kohë. Tashmë, në vendin ishullor meritojnë një falënderim për faktin se kanë shmangur një tragjedi të mundshme.
“FSHF kishte kontraktuar për këtë udhëtim një avion çarter, Boing 737, i cili për shkak të një defekti teknik, i lajmëruar pas ndeshjes, përpara se skuadra të shkonte në aeroportin e Keflavikut, nuk është ngritur për fluturim. Kompania, pas një vonese, ka siguruar një çarter tjetër, i cili ka rikthyer skuadrën në atdhe, duke garantuar kushtet për një fluturim të sigurt. Kjo është e gjithë historia e udhëtimit”, tregon zyrtari i FSHF-së. Skuadra kuqezi udhëtoi gjithë natën duke u gdhirë 9 qershor dhe kjo prishi të gjitha planet e trajnerit Edi Reja për një stërvitje normale në ditën pas ndeshjes në Islandë. /Panorama Sport
