Festivali i 58-të i këngës në RTSH ka qenë ndër “temat” më të nxehta të showbizit këto ditë.
Siç edhe ju mund ta keni mësuar tashmë, fituese u shpall Arilena Ara, ndërsa në vend të dytë u rendit Elvana Gjata.
Dhënia e pikëve nga juria shqiptare është komentuar shumë dhe ka shkaktuar reagime të forta nga personazhe publikë dhe jo vetëm.
Fakti që Gjata u vlerësua maksimalisht nga anëtarët e huaj, nxiti në rrjetet sociale krijimin e një teorie konspirative se votimi nga ana e anëtarëve shqiptarë ishte i qëllimtë për të favorizuar vetë Arilenën.
E ftuar mëngjesin e sotëm në “Wake Up”, shkrimtarja Rita Petro, anëtare e jurisë në festivalin e RTSH-së u shpreh se votimi ishte teknikisht i pastër dhe shumë i sinqertë.
“Gjithë kohës që kemi qenë në koncert bisedat ishin te kënaqësia e spektaklit, duke dëgjuar këngët harroja që isha pjesë e jurisë, edhe anëtarët e tjerë merrnin kënaqësinë e këngëve. Nuk është diskutuar se cilat janë preferencat e secilit prej nesh, këtë e them me kompetencë.
Nuk u bë llogari. Emri i Elvanës as nuk është zënë ndonjëherë as nga anëtarët e jurisë; edhe kur na mblodhën në dhomë (për të votuar) nuk është zënë në gojë as emri i Elvanës as i asnjërit këngëtar. Nuk ishim ne që ju thamë na merrni në juri, na thirrën e pranuam u ndjemë të nderuar.
Duhet një reagim publik institucional, i organizatorëve, çdo gjë është bërë në rregull. Na vjen keq që na ndanë juria shqiptare e huaj, të bësh ndarjen juria shqiptare nuk janë të zotët, të korruptuar e kam ndjerë veten të fyer. Deri për Eurovizion ka kohë që të analizohen faktet, të hetohet, të ngrihet një juri tjetër”, tha Petro.
