Gazetari dhe analisti i njohur Baton Haxhiu, ka rrëfyer për publikun një histori me ish-kryeministrin Berisha, të cilin e kishte këshilluar për zgjedhjet e vitit 2005. Mbrëmjen e djeshme, në emisionin “Zonë e Lirë”, Haxhiu tha se tre ditë para se Berisha të fitonte zgjedhjet, ai i kishte shkuar në zyrë.
Haxhiu e kishte sugjeruar që të shkonte e të kërkonte vetë votën në bastionet më të vështira. Madje, gazetari ka treguar edhe disa nga detajet e asaj dite. Sipas tij, Berisha në atë periudhë e donte me çdo kusht rikthimin në pushtet, dhe se po e vuante.
“Ishte keq, i ishte tharë buza. E donte rikthimin në pushtet. E kishte artikulimin gati të pafuqishëm. Nuk i dilnin fjalët. Thoshte “është e mundur kjo”, unë i thashë: O doktor i ke kaq vota minus. I thashë koncentroje fushatën në Pogradec dhe në Korçë.
I thashë; shko atje dhe kërko votën. Ia tregova me hartë ku të shkonte. Në vitin 2005, nuk e besonte se do të fitonte. I thashë, zgjedhjet i ke të fituara. I thashë mos i prano fitoren në tavolinë të Bashës.
Ditën që prenë kurban për fitoren e tij, dola në darkë me Ramën dhe i thashë: Miku im, nga sot je kryeministër i Shqipërisë”, tha Haxhiu.
