Ish-trajneri i Dinamos, Faruk Sejdini, i ftuar në emisionin Rubrika Sportive në RTSH, ndër të tjera ka komentuar edhe situatën që po kalon Kukësi. Ai është shprehur se nuk është normale të luash futboll në kushtet që ndodhet fusha e verilindorëve, pasi më shumë ngjanë si një kamp refugjatësh. Ndërsa nuk mbeti pa komentuar edhe fakti që drejtuesit e Kukësit këtë javë vendosën të shpallin “non grata” arbitrin Enea Jorgje, për të cilin Sejdini jep një përgjigje mjaft pikante.
“Dua të them se në fushën e Kukësit nuk luhet futboll. Nuk e kuptoj dot faktin se si ekipi kampion i Shqipërisë, mund të luaj në një terren të tillë. Ajo fushë është bërë si kamp refugjatësh. Nuk mund të flitet për skema futbolli aty. Me atë gjendje, më pas vijnë edhe dëmtimet dhe traumat për futbollistët”-deklaroi “xhaxhi”.
Po në lidhje me Kukësin, për shpalljen “non-grata” të Enea Jorgjit, Sejdini u shpreh: “Nëse Kukësi vendos ta shpallë të padëshirueshëm Enea Jorgjin, atëherë le ta dorëzojë edhe titullin që mori sezonin e kaluar. Ndoshta drejtuesit mendojnë se Jorgji bën për skuadrat e tjera, atë që bëri vjet në favor të tyre.”
