Ish-ministri i Brendshëm, Flamur Noka, e ka cilësuar veçse si një show atë se çfarë fshihet pas OFL-së. Në studion e lajmeve të “Fax News”, teksa ka folur rreth Operacionit Forca e Ligjit, ai tha se nuk është gjë tjetër veçse një makiazh që i bëhet ‘Rilindjes’ me mbulimin e fytyrës si bashkëpunëtore me krimin e organizuar. Duke qëndruar në të njëjtën linjë, për të, kjo është edhe një luftë që bëhet për të zhbërë Reformën në Drejtësi. Noka vijoi më tej duke nënvizuar se krimi luftohet vetëm me vullnet politik, dhe jo me show politik e propagandistik.
“Partia Demokratike është deklaruar që në kohën e qeverisjes së saj se ka qenë për zero tolerancë ndaj krimit të organizuar dhe shkeljes së ligjit. Ndaj për të qartësuar çdo skeptik, arsyeja pse ne jemi tejet skeptik ndaj Anti-KÇK është sepse KÇK nuk mund të bëjë ligj ANTI-KÇK. Njeriu që përfaqëson botën e errët të krimit, nuk mund të jetë ai që lufton këtë botë, e gjitha kjo është propagandë. Edi Rama në të gjitha sondazhet të realizuara nga ai vetë dhe shoqata pranë tij, ka mësuar se është në një pikiatë. Pse u liruan të gjithë bosët një e nga një gjatë viteve të qeverisjes së tij? Të gjithë drejtojnë gishtin dhe tregojnë se është Edi Rama.
Krimi luftohet vetëm me vullnet politik, dhe kur është ky, ndërmerren nisma kundër tij, nuk luftohet me show politik e propagandistik. Që të luftosh krimin e organizuar përveç vullnetit politik, duhet të jesh jashtë tij. Është dokumentuar dhe provuar me zë e me figurë se janë të lidhur me krimin. Ky do të luftojë Roshin, Kajmakun, Babanin? Kjo bota e zezë duhet luftuar dhe e kemi kërkuar gjithmonë. Sajmir Tahiri duhet të jetë i pari, Geron Xhafaj duhet të jetë aty. Pse nuk janë? Se i mbron Edi Rama, nuk mund t’i nguli thikën vetes.
Ky ligj është një amalgamë nenesh të ligjeve të tjera, por të deformuara duke i dhënë policisë dhe drejtorit të saj kopetenca gjykatësi dhe prokurori, duke e goditur brinjë më brinjë Reformën në Drejtësi. Jeni dëshmitar i betejës së egër që ka bërë opozita në 2017, që BKH dhe SPAK të mos i nënshtrohen qeverisë, sepse u krijuan për të luftuar zyrtarët e politikanët e lartë dhe krimin e organizuar.
Dy janë arsyet pse Edi Rama e ka organizuar këtë. E para show propagandistik dhe e dyta për të vrarë Reformën në Drejtësi. Kanë frikë sepse janë koncesionet e pafund, tendera super korruptiv. Nuk është e largët dita që institucionet ndërkombëtare e kanë konsideruar Shqipërinë si një nga vendet më të korruptuara dhe investime të huaja nuk ka.
Edi Rama kërkon që Reformën në Drejtësi ta bëjë Ramaformë. Një nga ligjet më të mira për luftën kundër krimit të organizuar dhe korrupsionit është ligji anti-mafia. Nuk luftohet krimi duke i dërguar një formular, por ka nevojë për hetime, gjurmime dhe më pas mund ta çosh para drejtësisë”, tha Noka.
