Ish-ministri i Jashtëm grek, Teodoros Pangalos ka bërë një deklaratë të fortë, lidhur me ngjarjen në Bularat të Gjirokastrës.
Pangalos tha se nuk mbështet faqezinjtë që sulmojnë policinë. Këtë deklaratë ai e bëri gjatë një interviste në televizionin Skai, ku u pyet lidhur me vrasjen e ekstremistit grek.
“Unë nuk jam pro faqezinjve kur hedhin molotov apo sulmojnë policinë. Nëse jeni ju …”, ka thënë politikani grek, duke thënë troç se nuk e mbështet veprimin e Kacifas.
Lidhur me thashethemet se e gjitha ndodhi, pasi Kacifas nuk u lejua të vendoste një flamur të madh grek, ish-ministri komentoi:
“Unë pashë në fotografitë të publikuara se kishte flamuj kudo në fshatra, nuk e kuptoj këtë që thonë se nuk e lejuan të vendosi flamur. Nuk e kuptoj se çfarë deshi ai të shkonte nga Greqia të vendoste flamuj aty? Nuk kishte kush ta bënte aty?”, u shpreh Pangalos.
Po ashtu, ai kritikoi deklaratën e Ramës, pasi sipas tij kryeministri shqiptar bëri deklaratë të gabuar në moment të gabuar duke thënë se ai donte të merrte vota në jug të Shqipërisë.
I pyetur nëse Greqia do pranojë kërcënime nga Shqipëria, Pangalos tha se politika e jashtme nuk bëhet kush është më i fortë.
“Nuk bëhet politik e jashtme me kush është më i fortë, kush bërtet më shumë. Me një ekonomi të shkatërruar nuk mund ta themi këtë. Greqia duhet të zgjidh problemet e saj me aleanca me fqinjët e saj”, u shpreh ish-ministri grek.
