Pas lajmit se ish-ministri i Brendshëm është arratisur nga vendi, burime pranë Saimir Tahirit tregojnë arsyen e largimit të tij nga Shqipëria.
“Është larguar nga vendi sot në drekë, për punët e tij personale de rikthehet nesër në mbrëmje”, ka thënë një burim për “CityNews.al”. Më pas i njëjti burim ka theksuar se “kjo fjali mjafton për të mbyllur çdo zhurmë që po krijohet në media për një arratisje të mundshme”.
Tahiri është në hetim nga Prokuroria pas përfshirjes së tij në dosjen “Habilaj”, ku deputeti dyshohet si i përfshirë në trafikun e drogës. Prokuroria për Krime të Rënda po zhvillon hetime, në bashkëpunim me autoritetet italiane. Në bazë të të dhënave të përftuara në kuadër të këtij hetimi, Prokuroria për Krime të Rënda kërkoi nga Komisioni i Mandateve në Kuvendin e Shqipërisë dhënien e autorizimit për “arrestimin, heqjen e lirisë dhe kontrollin personal e të banesës” për deputetin Saimir Tahiri.
Kjo kërkesë u rrëzua në Kuvend me 75 vota kundër dhe 60 pro. Tre deputetë të PDIU-së bashkuan votat me mazhorancën në mbrojtje të ish-ministrit. Ndërkaq, 5 deputetë nuk morën pjesë në votim. Bëhet fjalë për deputetët Saimir Tahiri, deputeti Tom Doshi, ministri Fatmir Xhafaj, deputeti Agron Çela i LSI-së dhe deputeti Vangjel Tavo.
Më pas u arrestua biznesmeni Orest Sota, i cili kishte 800 mijë euro dhe dy dëshmi aftësie për drejtim mjeti në emër të ish-ministrit të Brendshëm Saimir Tahiri. Për këtë, ai tha në polici se paratë ishin të babait të tij për një pagesë. Në lidhje me dy patentat e Tahirit, biznesmeni ka thënë se i kishte harruar shoferi i tij, që ishte mik me të.
