Ish-lojtari i kombëtares merr një dhuratë të çmuar nga Neymar

Dhurata që ndoshta do të gëzonte çdo futbollist, një fanellë e yllit brazilian Neymar, me autografin e tij. Renato Arapi prej pothuaj 2 vjetësh luan në kampionatin turk me Boluspor dhe njohja me shumë futbollistë të tjerë të huaj i ka dhënë mundësinë të marrë një dhuratë shumë të veçantë.

Nëpërmjet një postimi në rrjetet sociale, futbollisti me orgjinë durrsake ka zbuluar dhuratën që ka marrë nga shoku i tij i skuadrës Andre Santos. Braziliani, që më parë është aktivizuar te Arsenal, por edhe në kombëtaren e Brazilit, i ka sjellë një fanellë të PSG, të autografuar as më pak e as më shumë, por nga Neymar.

Braziliani Neymar autografin e tij e ka bërë nominale dhe sigurisht që Arapi ja ka kthyer me një falënderim në rrjetet sociale brazilianit. Arapi ka qenë një mbrojtës i spikatur në kampionatin shqiptar në vitet e fundit, si pjesë e Skënderbeut. Më parë ai është aktivizuar edhe me Dinamon, Besën dhe Shkumbinin. Arapi numëron edhe 4 ndeshje me ekipin kombëtar.