Brisida Shehaj, ish drejtoreshë e përgjithshme e Tatimeve, tashmë pjesë e Lëvizjes Socialiste për Integrim, i ka shpallur ‘luftë’ të hapur Ramës. Nënkryetarja e LSI-së për Tiranën, Brisida Shehaj, i është drejtuar kryeministrit Edi Rama me disa pyetje lidhur me Rafinerinë e Ballshit. Ajo fton kryeministrin që pasi të informohet nga institucionet përkatëse, të mos lejojë askënd të vjedhë gjakun dhe djersën e shqiptarëve.
Naftëtarët e Ballshit prej 21 ditësh janë futur në grevë urie, pasi kërkojnë pagat e tyre dhe rikthimin në punë. Në ditën e 18-të të grevës, 10 naftëtarë e lanë grevën për shkak të gjëndjes së rënduar shëndetësorë, ndërsa u zëvendësuan nga gratë.
E plotë:
Kur para syve tanë konsumohet një dramë, që përfshin gra me sëmundje të pashërueshme e të tjera në gjendje katastrofale të lindin disa pyetje:
- A ka informuar Ministra e Financave Kryeministrin se Administrata Tatimore është në një proces gjyqësor për pronësinë e Rafinerisë së Ballshit?
- A ka informuar Ministria e Financave Kryeministrin se Kompania Përmbarimore, që ka zhvilluar ankandin për shitjen e Rafinerisë së Ballshit ka shkelur ligjin, duke hapur një ankand për një aset, që i përkiste shtetit, bllokuar për llogari të tij për shkak të borxheve të mëdha të mbartura në vite, si pasojë e keqmenaxhimit nga kompanitë?
- A e di Kryeministri se Kompania Përmbarimore (për të cilën gazetarët dhe mediat duhet të hulumtojnë) ka shitur që në ankandin e parë, në shkelje flagrante të ligjit për ankandet Rafinerinë?
- A e di Kryeministri se ankandi i parë dhe i vetëm është bërë me kompensim dhe jo me vlerë e ku shteti nuk ka marrë mbrapsht asnjë cent nga miliardat e borxheve të kompanive?
- A e di Kryeministri se të vetmit përfitues të atij ankandi kanë qenë Banka dhe kompanitë, që kanë keqadministruar Rafinerinë?
E ftoj Kryeministrin e vendit, që pasi të informohet nga institucionet përkatëse, pasi të shohë edhe këtë foto drame të reagojë e të mos lejojë askënd të vjedhë gjakun dhe djersën e shqiptarëve.
