Ish-deputetja e LSI, Nora Malaj ka reaguar në lidhje me ironizimin që kryeministri Rama i bëri kryebashkiakes së Përrenjasit, Miranda Rira, pasi kjo e fundit është shtuar me fëmijë.
Rama, teksa i uroi jetë të gjatë foshnjës, tha se pas zgjedhjeve, ajo do të ketë më shumë kohë për t’iu dedikuar bebes, duke nënkuptuar se PS do ta fitojë këtë bashki.
Përmes një statusi në ‘Facebook’, Malaj i drejtohet Ramës duke i thënë se “Mëmësia është shenjtëri dhe jo punë detyruese që jepet për ndëshkim, o ti njeriu pa mend!”.
Sipas saj, kryeministri nuk di se çfarë do të thotë rritja e një fëmije, pasi për të ekziston vetëm kolltuku.
“Po ku di ti se ç’është rritja e një fëmije, që gjetsh belanë.
Për ty ekziston vetëm një fjalë, kolltuku yt. Sot me fjalët që the ti nuk fyeve Mirandën, po ti fyeve çdo grua e vajzë, çdo nënë e gjyshe, hodhe poshtë të gjitha ato ligje që me aq mund e djersë, ditë e netë pa gjumë, i kemi bërë për të ndërtuar një shoqëri me vlera, duke i dhënë vlerësimin e merituar gruas, e duke e larguar sa më shumë nga gjuha seksiste”, shkruan ish-deputetja.
Më tej, Malaj shprehet se kryeministri tregoi edhe njëherë se ndodhet në buzë të greminës, pasi u mor me bebet e pafajshme duke përdorur gjuhën e diktatorit.
